Spurningar og svör

Sjá: Kennsluvefur gerður sýnilegur nemendum.

Nemendur sjást ekki í nemendalista námskeiðs í Moodle fyrr en eftir að þeir skrá sig inn í Moodle í fyrsta skipti.

Nauðsynlegt er að láta nemendur vita af því í upphafi misseris að áríðandi sé að skrá sig inn í Moodle sem fyrst.

Þegar umræður eru notaðar í námskeiði kemur fyrir að Moodle sendir póst til allra í námskeiði í hvert skipti sem einhver skráir innlegg í umræðu. Tveir hlutir hafa áhrif:

1. Áskrift umræðu
   Ef umræðan er stillt á skylduáskrift geta nemendur ekki sagt upp áskrift að umræðunni. Áskrift þýðir tölvupóstur. Í uppsetningu umræðunar getur kennari breytt í valkvæma áskrift, þá stjórnar nemandi því hvort hann er áskrifandi eða ekki. Mælt er með að nota ekki skylduáskrift nema brýna nauðsyn beri til.
2. Persónulegar stillingar notanda
   Hver og einn notandi getur haft áhrif á fjölda tölvupósta sem hann fær frá Moodle með því að breyta eigin stillingum. Í kjörstillingum umræðu getur notandinn stillt hvort hann fær einn tölvupóst daglega með öllum innleggjum í umræðu (eða einungis titlum) eða hvort hann fær póst í hvert skipti sem einhver skráir innlegg í umræðu, sem hann er áskrifandi að. Hér fyrir neðan eru persónulegar stillingar vegna umræðna útskýrðar.

Persónulegum stillingum notanda breytt vegna umræðna

1. Smellið á eigið nafn í efra hægra horni og veljið stillingar.
2. Smellið á kjörstillingar umræðu og veljið það sem hentar (sjá nánari útskýringar fyrir neðan).

Hvers konar samantekt - Viðfangsefni (einn tölvupóstur á dag, einungis með viðfangsefnum)

Ef þetta er valið fær notandinn einn tölvupóst á dag frá Moodle einungis með titlum innleggja í umræðu sem hann er áskrifandi að, innleggin sjálf þarf hann að lesa á Moodle.

Sjálfvirk áskrift að umræðu

Hér getur notandinn valið hvort Moodle gerir hann sjálfvirkt að áskrifanda umræðu þegar hann skráir innlegg í umræðuna.

Fylgjast með lestri umræðna

Þegar valið er „Já: auðkenndu ný innlegg“ fylgist Moodle með hve mörg innlegg hafa bæst við umræðu frá því að notandinn skoðaði hana síðast. Þetta sést á forsíðu námskeiðs aftan við tengil á umræðu t.d. „(3 ný innlegg)“. Þessi stilling er þægileg að því leyti að notandinn þarf þá ekki að opna umræðu til athuga hvort eitthvað nýtt hefur bæst við.

„When sending forum post notifications“

Þegar notandinn fær tölvupóst um innlegg í umræðu, er hægt að velja hvort viðkomandi innlegg skuli merkt sem lesið í Moodle. Þá kæmu ekki fram upplýsingar um innleggið á forsíðu námskeiðsins skv. kaflanum hér fyrir ofan.

Á stjórnborðinu undir flipanum námskeið eru undirfliparnir í gangi, væntanleg og eldri. Til að námskeið raði sér undir viðeigandi flipa þarf kennari að tilgreina hvenær námskeið hefst og hvenær því lýkur, í uppsetningu námskeiðs. Svona er farið að:

1. Opnið tiltekið námskeið.
2. Farið í uppsetningu undir umsýslu námskeiðs (vinstra megin í stillingum).
3. Skráið dagsetningu við námskeið hefst og námskeiði lýkur (ofarlega).
4. Smellið á vista og birta.

Nemendur

Til að nemandi (eða kennari) fái ekki öll gömlu námskeiðin sín undir flipann í gangi er nauðsynlegt að kennari skrái hvenær námskeiði lýkur. Að sama skapi er mikilvægt að skrá hvenær námskeið hefst til að námskeið næsta misseris komi undir flipann væntanleg.